विहान कलेज जाने, दिउँसो जागिरमा जाने अनि फुर्सदको समयमा डेटिङ जानका लागि बाइकमा तेल नहुँदा दैनिकीमा समेत फेरबदल हुन थालेको बताउँछन् घोराही नगरपालिका – १० निवासी युवा रविकिरण केसी । बैंङ्किङ क्षेत्रमा कार्यरत केसी घरदेखि अफिस आउजाउ गर्न, अफिसको लागि फिल्ड हिड्न निकै गाह्रो भएको पनि उनी बताउँछन । उनले थपे ‘अफिसको काम गर्न निकै अप्ठ्यारो परेको अवस्था छ, अझ यसो शनिबार मनमिल्नेसँग कतै जाऊँ भन्दा पैदल हिडनुपर्ने अवस्था छ ।’
भारतीय नाकाबन्दीले देशभक्तहरुलाई एकै ठाउँमा उभ्याए पनि दैनिक जीवन कष्टकर बन्दै गइरहेको भनाई छ मिलनचोक निवासी शशि थापाको । ‘नाकाबन्दीले राष्ट्रियता र आत्मनिर्भरताको विषयमा हामीलाई राम्रो पाठ सिकायो तर के गर्नु दशैंको आसपासमा डेटिङ जान नपाइने भयो जस्तो लागेको छ’ थापाले बताए । तर उनले यस्ता सानातिना समस्या पर्दैमा नेपाली भारतीय सामू झुक्न नहुने भन्छन् । उनले भने ‘बरु बाइकको ठाउँमा साइकल लगेर डेटिङ गइन्छ तर झुक्न दबाब दिइन्न ।’ विहान कलेज गएर दिउँसो डेटिङमा भेट्ने वाचा गर्नेहरुलाई पनि यो नाकाबन्दी र पेट्रोलको अभावले निकै समस्या पारेको युवाहरुको बुझाई छ । ‘विहान कलेज गएको बेला दिउँसो भेटौंला भनेर छुट्टिएको थिएँ तर बाइकमा हाल्ने तेल छैन, पैदल हिडेर घुमाउन लाज लाग्छ । नाकाबन्दीले हाम्रो भेटघाटमा पनि समस्या पारेको छ’ घोराहीका युवा शुलभ वैद्यले गुनासो पोखे । उनले पनि समस्यासँग जुध्न तयार रहेको जनाउ दिँदै भने, ‘यस्ता असजिला सहन्छौ, तर भारतसँग नझुक्न नेतृत्वलाई आग्रह गर्छौं ।’
उसो त नाकाबन्दीको सन्दर्भमा युवा पिढीमा देखिएको देशभक्तिको भावनाले नेता र आमजनतामा हौसला प्रदान गरेको देख्न सकिन्छ । सरकारलाई पेलेर पेट्रोलियम पदार्थमा सहजता ल्याउन आन्दोलन गर्न सकिँदैन भनेर भन्छन् घोराही – ११ उमेशमार्गका युवा व्यावसायी भरत पौडेल । ‘समस्या त यति परेको छ कि भनेर साध्य छैन तर पनि राष्ट्रियताको सवालमा हिम्मत लिइएको छ’ पौडेलले बताए । अविवाहित पौडेलले पनि पेट्रोलको समस्यासँगै डेटिङमा पनि समस्या परेको बताए । उनले भने ‘माया पिरतीमा पनि समस्या चै परेकै छ ।’ घोराहीकै युवा राज भण्डारी पनि पेट्रोलको अभावसँगै डेटिङमा समस्या भोगेको बताउँछन् । उनले भने ‘साथीहरु खाजासँगै खाऔं, एकैछिन भए पनि सँगै घुमौं भन्ने मानसिकता बोकेका हुन्छन्, तर आफू भने बाइक नहुँदै कतै निस्कनै मन लाग्दैन, साचिकै भन्नुपर्दा भेट्न नपाउँदा मन आत्तिएको पनि छ र उनले कुरा नबुझ्दा झगडा पनि परिरहेको छ ।’
No comments :
Speak Your Mind: